Happy birthday呀，語言學及現代語言系！
孟子曾經講過：「人之所以異於禽獸者幾希。」人同禽獸嘅差異其實好細，孟子認為仁義禮智係其中一個分別。除咗仁義禮智之外，我覺得人同禽獸最大嘅分別，就係人係一種有語言，有文字，同埋可以用符號表意嘅動物。身為一個人，我哋有咩原因唔去了解一下呢種與生俱來嘅能力？呢個就係我當初大學揀科揀語言學嘅原因。
眨下眼，喺呢度已經就快六年啦。六年話長唔長，話短唔短，睇住學系成長嘅同時，我相信好多教授都睇住我自己慢慢成長。「咦？你讀語言學呀？即係識邊種語言呀？」「廣東話有grammar嘅咩？點解我唔覺嘅？」「細路仔係咪應該學完一種語言先學第二種語言？廢事佢哋撈亂啦！」上至政府高官，下至學生家長、親朋戚友都問過我呢啲（唔係「尐」）問題，真係解釋到口水都乾。不過，解釋到口水乾晒都要解釋。點解？因為我哋身為語言學學生，我哋絕對有知識，有義務去解答呢啲問題。好似近期「廣東話非法定語言」嘅爭議，同埋網上越嚟越多人用「尐」取代「啲」嘅現象，我相信大家身為語言學學生絕對有能力去解釋呢啲現象，同埋消除社會上某啲人對語言學理論嘅誤解。
諗返起呢六年以嚟，undergrad嘅時間其實係最開心：雖然課程艱深，概念抽象（當年嘅感覺），但係有一班好好嘅教授盡心教學，有一班互相學習，支持同鼓勵嘅同學。時間過得好開心，亦過得好快。上到M.Phil.之後，壓力大咗好多。我除咗要了解其他人嘅研究之外，仲要開始建立自己嘅研究。呢個過程雖然辛苦，但係當睇住自己嘅研究慢慢成形，我真係覺得好開心，好滿足。
趁機會講吓自己嘅研究先！如果「語言學只係學一種語言」、「廣東話係無grammar」，而且「細路仔學完一種語言先學第二種語言」，你而家根本唔會睇到呢篇sharing，甚至呢個學系都唔會存在。我研究嘅對象係一啲喺外國出世同長大，喺屋企同屋企人講廣東話，但係喺出便同人講英文嘅人。喺呢個咁特殊嘅情況之下，佢哋嘅廣東話會因為種種原因，同我哋嘅廣東話相比出現好多有趣嘅現象。而我就係去研究呢啲現象，解釋佢哋出現嘅原因。呢兩年嚟，我除咗好多謝學系入便嘅教授嘅指導同埋同學間嘅交流之外，亦都好多謝學系俾機會我去美國同埋新加坡發表自己嘅研究，同其他喺同一個領域嘅朋友交流交流。